DINIKY NY FO

Tena mampioron-koditra ny maheno fa indrindra ny mahita ity ady tsy misy farany ity. Vaovao alefan'ny TV Italiana matetika  ny fandehanan'ny miaramilany misatro-manga hampandry tany any Liban.

Fa inona moa ny Fandriampahalemana?

Ara-bakiteny (foto-teny : mandry sy alina) dia ny fahafahana matory tsara amin'ny alina no atao hoe fandriam-pahalemana. Ny mifanohitra aminy dia ny mandry tsy lavo loha...

PAX, PAIX na PACE... Shalom sy Shalam... dia enti-milaza ny fandriam-pahalemana izay manjary mitovy hevitra amin'ny hoe fiadanana ...

Ny tiako hifampizarana aminao fotsiny dia izao : ilay ohabolana anglisy malaza hoe : Charity begins at home, manomboka ao an-trano ny fifampitsinjovana. Tsy afaka ny hanome fiadanana ny hafa ianao raha tsy ianao mihitsy aloha no efa miaina izany fiadanana izany...

Dia ahoana no hahafahana miaina ny fiadanana?

Fotoana hirosoan'ny ankamaroan'ny olona amin'ny dingam-piainana manaraka izao fotoana izao...

Ho an'Antananarivo manokana, eo amin'ny s ehatry ny fivavahana katolika dia mazàna amin'izao fotoana izao no hirosoan'ireo pretra sy relijiozy amin'ny Sakramenta sy ny Voady... tsy vitsy koa anefa ireo miroso ho amin'ny fanambadiana... dingam-piainana izany.

Ny tiako hisarihana ny sainao fotsiny dia izao : na ny voady (farany hoe!) ataon'ny relijiozy, na ny fanomezan-toky ataon'ny mpivady dia samy dingam-piainana nefa koa samy mandrakizay...

Mety ho gaga ianao hoe fa inona moa no olana amin'izany! Dia eo indrindra no olana...

...Dingana ho amin'ny mandrakizay izy io, tsy tanjona fa dingana...

Raha mahatsapa ny Relijiozy sy ny Pretra fa dingana no ataony fa tsy famaranana lalana dia tsy dingana ho amin'ny fihatoana tsy akory fa fanombohana dingana ho amin'ny mandrakizay ka izorana tsy ampisalasalana intsony ho amin'ny lalam-pahamasinana...

Dia toraka izany koa, raha raisin'ny mpivady ho dingam-piainana ny andron'ny mariazy, dia ho zary fanohitra lehibe ny fahatsapana fa hay moa olombelona ilay silaky ny aina nifanolorana fitiavana ka na mitoetra sy miha-mitombo aza ny fahitana ireo toetra mambabo, dia tsy ilaozan'ny tandra vadin-koditra, izay handrefesana ny halalin'ny fitiavana ka hahatonga ny fanambadiana ho sakramentan'ny Fitiavana, dia ilay Fitiavana nahatratra ny fahataperany teo ambony hazofijaliana rehefa nanaiky ho faty ho an'ny mpanota ilay tsy manan-keloka...

Fa na eo amin'ny sehatry ny asa aza, raha heverin'ny tanora nahavita fianarana ho dingam-piainana ny firosoany eo amin'ny tontolon'ny asa, dia minoa ahy ianareo fa ho lasa lavitra ity Firenentsika ity...

Tiako ary ampahatsiahiviko anao, na dia tsy mbola haintsika aza ny miaina azy ilay sombiteny malaza hoe : "sahia manao  dingana lehibe"

Entiko hamaritana ny atao hoe : FANABEAZANA, ny hoe "Fikatsahana ny Fanjakan'Andnriamanitra", araka ny Soratra Masina (Mt 13, 44-46ss). Araka ny voasoratra ao manko dia tahaka ny voahangy sarobidy ny Fanjakan'ny Lanitra, ka izay mahita azy dia hivarotra ny voahangy efa voahangony ka hividy io voahangy tsara io;

Araka izany, ny asan'ny mpanabe, indrindra ireo nahazo andraikitra manokana hanabe ara-pinoana (Raiamandreny, Mpampianatra sekoly alahady sy katesizy...) ny manampy ireo olona ankinina aminy hikaroka io voahangy tsara io, hikaroka ilay rakitra nafenina tany an-tsaha.

Marina fa araka ny fomba fitantaran'ny Vaovao Mahafaly dia mety tsy ho natao anton'asa ny fitadiavana na ny rakitra na ny voahangy, fa kosa eo am-piasana ny saha na eny am-pitsangatsanganana, nefa tsy maintsy hanao ezaka hividy ny saha... Mety ho anton'asa koa anefa, toy ilay mpivarotra mitady voahangy lafo vidy!!!

Fa ny tsy azo lavina fa lalana iray tsy maintsy hizoran'ny fiainana dia ny fahafoizana...

Ny fanabeazana rehetra dia fanabeazana hahafoy izay nanana mba hananana tsaratsara kokoa. Ny tena mpanabe araka izany dia tsy sanatria izay manery ny beaziny hanary na hivarotra sahady ny kely ananay mialoha ny hahitana izay tsaratsara kokoa...

Ny fampitana ny soatoavina (valeur) no tena fanabeazana ary marika handrefesana ny fanabeazana mahomby ny fahafohizan'ny beazina izay nananany hilofosany hahazo ny tsaratsara kokoa, mandrapahitany ny tsara indrindra.

Tandremana anefa satria anisan'ny fahosan'ny olombelona ny mety hahadiso ny fiheverana ny atao he tsara (conscience erronée)

Salamo manambara fitokiana amam-pangatahaha eo anatrehan'ny fanaratsian'ny fahavalo ity Salamo ity, kanefa ihany koa salamo mamintina ny fomba hifandraisan'ny Mpino amin'Andriamanitra.

Ao anatin'ny fitantarana "ilay Mpaminany tsy masina an-taniny" moa no androsoan'ny Litorjia Katolika ny fandinihana ity Salamo ity.

 I Ezekiela (2,2-5) dia voahiraka ho eo ampovoan'ny Vahoaka mafy loha sy tsy mety hihova, mba hampahatsiaro mandrakariva fa eo afovoan'ny vahoakany ny Tenin'Andriamanitra (izay no asan'ny Mpaminany).
I Paoly anefa milaza fa na eo aza izany asa sarobidy izany dia mazàna ilay voahiraka mihitsy no tonga malemy mba tsy hirehareha amin'ny fahombiazany fa hifikitra mandrakariva amin'ny fahasoavan'Andriamanitra (2Kor 12,7-10).
Dia tohizan'i Marka (6,1-6) hoe "tsy ho masina an-taniny ny mpaminany".

Lavitra ilay samy masina an-taniny fitenintsika ity. Nahoana tokoa moa no tsy zakan'ireo mpiray tanàna aminy ny maha-Mpaminany an'i Jesoa?

Tsy ho azontsika izany raha tsy verenana jerena manontolo ny fitantaran'i Marka ny atao hoe Finoana fa indrindra ilay Jesoa toa tsy mandraharaha akory ireo mpiara-belona aminy fa variana "matory" fotsiny.

Ity Salamo ity ary, dia azo heverina fa mamintina ny mety ho fifandraisantsika amin'Andriamanitra, indrindra manoloana ny mety ho olana diavina eo amin'ny Fiainana.

Fa ahoana tokoa moa izany Fiandrandràna ny tanan'ny Tompony izany? Inona no andrandraintsika avy amin'ny tanan'ny tompontsika?

• Ao ireo tsy miandrandra afa-tsy karama avy amin'ny tanan'ny Tompony. Dia mimenomenona fatratra raha tsy mahazo na mahazo kely: Ireo ilay manao an'Andriamanitra ho Fiitaovana ka rehefa tsy mahafa-po ny filàny dia ezahany ahilika tsy ho eo amin'ny fiaraha-moniny.
• Ao kosa ireo tsy miandry avy amin'ny tanan'ny tompony afa-tsy ny baiko midina, ny fanondro milaza ny asa atao : dia lasa Andriamanitra masiaka ilay Andriamanitra Fitiavana, lasa Andriamanitra tsy azo ihodivirana fa mandahatra ny zava-drehetra. Andriamanitra naka ny fahafahana ao amintsika.

Vokatr'ireo foto-pisainana roa ireo dia misy ny mpino manadino ny ezaka tokony hataony satria hoe : Andriamanitra no mandahatra ny zava-drehetra, ka izay "mahasoa ataon'Andriamanitra". Misy kosa ny madino ny Fahasoavana hahafahany miroso ara-panahy ka manao araka ny fahendreny fotsiny.

Ny famintinan'i Ignace de Loyola (mety hanampy anao) izany dia hoe "mivavaha ho toy ny miankina amin'Andriamanitra ny zava-drehetra, ary miasaha ho toy ny miankina aminao ihany koa".

Mandrisika antsika handanjalanja mandrakariva izany mba tsy ho sanatria ny fangatahana ny fahasoavana no hisosoan'ny hakamoana ka hanadinoana ny ezaka tokony hatao, na koa ho sanatria ny filofosana hanao ezaka no hanadinoana fa raha tsy "Izy" tsy mahefa na inona na inona isika.

Miandrandrà ny tanan'ny Tompontsika, matokisa Azy fa sady miaro antsika amin'ny fahavalo izy no manome izay ilaintsika. Aza adino koa anefa fa manondro izay lalana tokony hombantsika koa Izy...