"Misy tsiambaratelon'ny fo, tsy ho azon'ny saina takarina na oviana na oviana" B. Pascal
Fifanakalozan-kevitra! Possible ve?
harilova | 28 Janoary, 2007 23:56
Heveriko fa laharam-pahamehana ho an'ny tontolo hiainantsika izao ny fahaizana mifanakalo hevitra. Nefa manahy aho hoe azo antenaina ve ny hahatanterahan'izany?
Taorian'ny herinandro nivavahana ho an'ny Firaisam-pinoana dia nanontany tena aho hoe : mba misy fanantenana ve ny hiraisan'ny Mpino? Asa... Mahefa ny zavatra rehetra Andriamanitra....
Fa ankoatra izany, na dia somary mifanohitra ihany aza ao amin'ny lalam-panorenana malagasy ny finoana an'Andriamanitra sy ny fahalalahana amin'ny sehatry ny finoana, dia tsy ho afaka ny hoterena velively ny finoana...
Mba hahafahana mifanakalo hevitra (dialogue) dia misy zavatra iray tsy maintsy apetraka ho fepetra : ny tsy fitompoana teny fantatra... Raha mihevitra ho manana ny marina ny andaniny dia mety hanana ny marina koa ve ny ankilany?
Rehefa mifanena amin'ny tsy Mpino ny mpino, hanaiky ny tsy finoany ve sa hanivahiva azy satria izay no safidiny, asa noho ny fahitany fa toa tsy manova inona loatra eo amin'ny fiainan'ireo mpino ny finoana narahiny... na vao mainka aza lasa fanafintohinana satria miaina ratsiratsy kokoa noho ny tsy mpino!!!
Zavatra roa no heveriko hiorenan'ny fifanakalozan-kevitra, ary zavatra tsy azo hiadian-kevitra : ny lalam-pitondrantena sy ny foto-pisainana.
1- Ny lalam-pitondran-tena (Morale)
Rehefa manizingizina ny fihambonian'Andriamanitra ny silamo na ny Kristianina dia heverina ho misy fiantraikany eo amin'ny fitondran-tena izany... Afaka manao izay tiany ny olona raha foanana ny finoana ny lanitra sy ny afobe... tsy hisy intsony ny tsara sy ny ratsy fa izay tiako sy ny mahafinaritra ny saiko no ataoko...
Raha mandinika tsara anefa isika, tsy azo adinoina fa ny fitondrantena ratsy ataon'ny hafa dia efa zary afobe sahady ho antsika, efa zary fijaliana, samy mizaka ny vokatr'izany... Araka izany, tsy ny finoana ny lanitra sy ny afobe loatra no iankinan'ny lalam-pitondrantena, fa ny fiaraha-miaina. Ka atao ahoana no hanafoana ny fiaraha-miaina? Araka izany tsy maintsy misy fepetra sy drafitra arahina mba hampirindra fiaraha-monina...
2- Ny Foto-pisainana
Ny tiako holazaina eto ny sain'ny olombelona iavahany amin'ny biby, ahafahany "miahy" sy "manahy". Dia nampiasain'ny olona marina tokoa ny saina ka hitantsika ny vokatry ny fikarohana siantifika izay toa tsy misy fetrany intsony...
Dia lazaina hoe tsy ilaina intsony Andriamanitra izay nanankinana ny tsy takatry ny saina hatrizay... Dia manjary resa-be ny bioéthique sy ny fikarohana ara-tsiantifika... te hanisy fetra amin'ny lafiny fikarohana ny mpitondra fivavahana satria hono hoe : lasa tsy misy vidiny intsony ny maha-olona fa zary seha-pikarohana sy fanaovana andrana toy ny natao tamin'ny bitrovoalavo fahiny...
Tsy ny fisian'Andriamanitra velively anefa no olana, tsy ny izy velively no hanakana ny olona tsy hisaina... Tsy ho zary takatry ny saintsika na oviana na oviana koa ny tontolo... ampahany ihany ary ampahany amin'ny ampahany nohalalinina manokana... Ny hainao tsy haiko, ny ato antsaiko tsy fantatrao...
Ny foto-pisainana dia ny zavatra manery antsika hanao safidy eo amin'ny fiainana... NAHOANA AHO NO MANAO ITY ZAVATRA ITY?
Rehefa mahita ny valin'io fanontaniana io ianao dia aza adino ny mametraka ny hafa manaraka : FA MANINONA AHO RAHA TSY MANAO ITY?.. Raha toa ka natao tsy am-piheverana, ankoatry ny fijerena sy fizakana ny vokany... dia miforona tsikelikely ny foto-pisainana rehefa tsapanao fa tsy irery ianao fa manana mpiara-monina ka manontany tena hoe : ARY MBA TIAKO VE RAHA (N)(H)(M)ANAO TOY IZANY KOA NY HAFA?
Fehiny dia hoe : hany fepetra hahafahana mifanakalo hevitra ny fifampitsinjovana mba hanao amin'ny hafa izay tianao atao aminao...
Tsy sanatria anefa hanakana anao tsy handrara ny hafa tsy hanao izay tsy mety ataonao izany fa kosa hanome hery anao hamporisika azy hitsinjo mandrakariva ny fiaraha-monina amin'ny fifampizakana ny kilema sy ny fiezahana tsy hanao izay tsy tianao ataon'ny hafa aminao...
Dialogue interreligieux |
Rohy maharitra |
Hevitra (5) |
Verindrohy (trackback) (0)
Ho anao ry Teofily!
harilova | 21 Janoary, 2007 14:46
"Ho anao ry Teofily manan-kaja no nanoratako ny Filazan-tsarako, mba ho fantatrao fa marina tokoa izay nampianarina anao". (Lk, 1, 1-4).
Resadresaka |
Rohy maharitra |
Verindrohy (trackback) (0)
Ny firaisam-pinoana! Rediredy sa revin-gadra?
harilova | 17 Janoary, 2007 23:32
Revin-gadra ve sa rediredy ity Firaisam-pinoana ity? Fiaraha-mivavaka eny an-kianja! na any an-tempoly... Fiarahana manohana am-bavaka ny firenena sy ny Mpitondra azy... Vavak'i Jeso (Jn 17) ny mba haha-iray ihany ireo rehetra hino Azy!
Izay hino Azy : mino fa tsy afaka hivavaka tsaratsara kokoa noho i Jesoa, kapiteniny. efa ho 2000 taona izay (latsaka kely foana) no nandaozan'i Jesoa ny tany, na dia milaza fa mitoetra eo anivon'ny fiangonany mandrakariva aza izy... nefa toa vao maika aza miady kitrana ny "mpino Azy"... Fa tsy mandaitra va re ny vavaky ny Zanak'Andriamanitra?
Heveriko fa tsy ny Vavaka nataony no tsy nandaitra, fa ny hino azy no sarotra hotadiavina : "Amin'ny andro hiverenan'ny Zanak'olona, mbola hisy finoana va re ety an-tany???"
Dia hoy aho hoe : revin-gadra sa sentosento ity vavaka atao mandritra ny herinandro ity? (18-25 janoary)?
Ekomenisma (oikoumené) hono e, Firaisam-pinoana!!! Fiaraha-mivavaka... Isaorana anie Andriamanitra. Mampandinika ahy anefa dia hoe : Fa tena mino an'i Jesoa ve ireo miara-mivavaka ireo? Mitovy ve ny fiheverana ny atao hoe Fivavahana? Sa mba fombafomba ihany ?
Heveriko fa ankoatra ny fiaraha-mivavaka, tokony hohamafisina ny fifanakalozan-kevitra fa indrindra ny fiaraha-mandinika ny atao hoe : Finoana sy ny fivavahaha, sao ny nantenaina hanirina vao maika hampivandravandra!
Samy manana ny foto-pisainana nanabeazana azy manko ny kristianina arakaraka ny foto-pinoana nanabeazana azy, ary mazàna ny fampitana sy fanazavana izany foto-pinoana izany dia ny Fanaratsiana na ny fitsikerana ny hafa... Tsy azo hodian-tsy hita izany : ao ny "mpivavaka amin'ny sarivongana", ao ny "kristianina tafasaraka"... dia voizina ny hoe "ny antsika ny sakramenta tsy 7 fa 2, tsy roa fa zato, tsy zato fa arivo... mitovy zò ny lahy sy ny vavy ka ny anay ny vavy koa azo atsangana ho mpitondra fivavahana!!!" Dia tsy mahagaga raha afaka mifanambady ny lahy samy lahy na ny vavy samy vavy satria efa samy mitovy!!!
Ny lalàna sy ny fampianarana ifotoran'ny Finoana no tena mampisaraka! Amporisihina ny rehetra hahay hiara-miasa hanorina fiarahamonina mandroso sy milamina...
Ny vavaka ataoko amin'ity herinandro ity sady amporisihako anao dia hoe :
"Tompo o!
Ampio aho hampiasa ireo lalàna ireo ho amin'ny fitiavana!
Ampio aho hizotra avy amin'ny Fitiavana ny lalàna ho amin'ny Lalàn'ny fitiavana!" Amen
Dialogue interreligieux |
Rohy maharitra |
Verindrohy (trackback) (0)
Fahagagana!!!
harilova | 14 Janoary, 2007 12:47
Mino ve ianao fa misy fahagagana ety ambany masoandro! Tsy "impossible" akory ny fahagagana fa zavatra tsy takatry ny herintsaina raha tsy ampian'ny Finoana...
Misy fomba fiteny hoe : impossible mais vrai! Dia tsy azoko mihitsy, satria raha toa ka "vrai" dia efa tanteraka, noho izany "possible". Tsy hoe zavatra tsy afaka hitranga tsy akory no atao hoe fahagagana fa zavatra tsy noheverina hitranga, ka hahitana ny asan'ny hery miafina izay mazana tsy takatry ny saina...
Mahagaga! Namaky ny resaka fahagagana [famantarana (archè)] tao amin'ny Evanjely (Jn 2, 1-12) aho maraina io, dia nihaino sy nijery tao amin'ny internet ny fampianarana momba io Evanjely io, dia samy milaza fa ny Rano novàna ho divay dia santatry ny hafaliana entin'i Kristy ho antsika eo amin'ny fiainana...
Ilay tenin'i Maria hoe "Tanteraho avokoa na inona na inona holazainy aminareo", dia manambara ny "vavaka" hifandraisantsika a,min'Andriamanitra... Tsy ny manatanteraka mazàna no mazana fa ny mahafantatra ny lazainy...
Fa mba hahafantatra izay lazainy, dia heveriko fa ny voalohany indrindra andrasana amintsika dia ny manasa an'i Jesoa ho ao amin'ny fampakaram-bady ...
Fampakaram-bady : izany hoe ny fisantarana ny fiainana, fanombohana ny fikasana ho mandramaty... I Kristy no hanampy antsika hisedra ny mety ho tafiotra raha ekentsika hitsabaka amin'ny raharahan-tokantranontsika izy...
Dia hoy aho hoe : angamba, io fanasàna omentsika an'i Jesoa hanatrika ny fetintsika io, fanasana Azy ho eo anivontsika, io no antsoina hoe : Vavaka!!!
Io no fanokafana ny maso hahita ny fahagagana!
Ho an'ny Mpino |
Rohy maharitra |
Hevitra (3) |
Verindrohy (trackback) (0)
Bedao ny fandrianao, dia mandehana mody!
harilova | 12 Janoary, 2007 18:48
Resaka fanasitranana ilay malemy nentin'ny havany teo aminy moa io Evanjely io. Tsy ny finoan'ny havany nandoaka ny tafon-trano loatra no tiako hifampizaràana aminao eto. Efa mahazatra ny maheno ny amin'izany...
Tsy ny toetsaina Jody izay mihevitra fa vokatry ny fahotana ny aretina sy ny loza mitranga, izay boka sy malemy dia nanota, na izy na ny ray aman-dreniny... tsy izany ihany koa...
Ho an'ny Mpino |
Rohy maharitra |
Verindrohy (trackback) (0)
Epifania : Fisehoan'ny Tompo!!!
harilova | 06 Janoary, 2007 22:41
Mankalaza ny Epifania ny Fiangonana katolika amin’ny alahady manaraka ny taombaovao. [1]. Epifania, avy amin’ny teny grika á¼?πιφάνεια,, midika hoe fisehoana, toy ny hoe “mivoaka hitàny” ho an’ny avy nifana!
Ankoatr'ireo Fisehoana telo asongadin'ny litorjia dia heveriko fa manamarika ny fiainan'ireo nisafidy ny fiainana voatokana (Relijiozy) ireo fisehoana ireo. izay no holazaiko anao ao amin'ny tapany faharoa amin'ity fifampizarana ity.
I- Telo ny fisehoan’i Jesoa asongadin’ny Litorjia :
1- ny fisehoana tamin’ny Majy
Ireo mpikaroka manampahaizana avy any amin’ny firenen-kafa, nahita ka nanaiky hotarihin’ny kintana ka tonga nitady ilay Mpanjakan’ny Mpanjaka (Mt. 2, 1-12). Nifanehatra tamin’i Eroda izy ireo, Eroda izay endriky ny fialonan’ny olombelona te handringana izay mety hisongom-bitana.[2] Nihaiky ny zava-nitranga izy ireo ary nikatsaka hatrany ny fahamarinana ka tafahaona tamin’ilay Mpanjaka afa-miteny amin’ireo mihaino ny marina (Jn 18, 37).
Ny fanomezana nomen’ireo majy an’i Jesoa dia Volamena, emboka ary ditin-kazo manitra. Araka ny kolontsiana tamin’izany dia manambara ny maha-Mpanjaka, maha- Andriamanitra ary ny maha-olombelona an’ilay tolorana azy ireo fanomezana ireo.
Ho an’ny Kristianina, ny Eokaristia no faratampon’ny fisehoan’i Kristy aminy. Dia inona no mba atolotsika Azy amin’izany fihaonana izany? Moa ve tsy ny fahavononana hampanjaka ny fitiavana, izay ambony lavitra noho ny volamena; ny vavaka sy ny fitalahoana amin’ny fo torotoro izay ambony lavitra noho ny fanatitra rehetra sy ny emboka manitra (cf Sal 51, 17…) ; ny fiezahana ho lavorary izay fanambarana fa tonga nofo tokoa ao am-pontsika ny Teniny?
Tsy ho adinointsika koa anefa fa nisy Majy iray (araka ny lovan-tsofina[3]), variana nizara ireo fanomezana nentiny ho an’ny mahantra hitany teny an-dalana, ary tafahaona tamin’i Jesoa Zazakely nitrotro ireo fanomezana nomeny ny mahantra… Izay manome ny mahantra, hoy i Joba, mampisambotra an’Andriamanitra.
2- Ny Fisehoana tamin’ny Batemy :
Ilay Fanahy Masina nidina naka endri-boromailala (Lk 3, 15-22) dia manambara an’i Jesoa nanamasina ny rano hanaovana batemy, ary mampisy heviny vaovao ny Batemy hanaovana batemy ireo hanara-dia Azy: Izy ilay tsy mila fibebahana manko nandray ny batemim-pibebahan’i Joany mba hanambarany ny hasarobidin’ny “Fitsobohana” ao amin’ny Reniranom-pahasoavana… dia ny Fanahy Masina…
Io Fanahy io no ananganana izay vita batemy ho zanak’Andriamanitra ao amin’i Kristy, ka ny Fiombonana amin’i Kristy no mampisy heviny ny fiainana…
Tsy azo adinoina fa naka endri-boromailala ny Fanahy, ilay voromailala nanambara ny faran’ny safodrano tamin’ny andron’i Noe (Jen 8, 6-12) izay midika fa tsy sazy intsony no tokony hibebahan’ny olona fa ny famindram-po sy ny fitiavan’Andriamanitra[4].
3- Ny fisehoana tamin’ny fampakarambady tao Kanà
Ny fahagagana voalohany nataon’i Jesoa, izay lazain’i Joany Evanjelista hoe “famantarana” (Jn 2, 1-11) dia manambara fa na dia efa tsy manan-kantenaina intsony aza isika, lavitry ny hafaliana – efa lany divay –, dia eo i Kristy, loharanon-kafaliana… kanefa kosa, tsy azo adinoina ny hafatr’i Maria Reniny amintsika : “Ataovy avokoa, na inona na inona holazainy aminareo…”, na inona na inona… Mitaky finoana izany.
II- Fiainan-drelijiozy
Ho an’izay nifidy ny fiainan-dRelijiozy, ireo fisehoana telo ireo dia mamintina ny voady telo natao teo anatrehan’Andriamanitra :
a) Nanaiky an’i Jesoa ho mpanjakan’ny Mpanjaka ireo Majy… Ny faneken-dRelijiozy dia mifototra amin’izay fiaikena ny maha-mpanjaka an’i Kristy izay, ka hikatsahana mandrakariva ny sitrapony, eny fa na dia tsy maintsy hanontany ny hevitr’i Eroda aza, ary hanaiky ny toroheviny… mandrapahita an’i Kristy…[5]
b) Ny fanamasinana ny ranon’ny Batemy dia manambara ny sitrapon’i Jesoa te hanadio ny fon’ny Relijiozy ho afaka hitia ny olon-drehetra araka ny fon’i Kristy… ka tsy hikolokolo fitiavana manokana mety hanakana izany fahafahana mitia izany : ny voadin’ny fahadiovana!
d) Ny Fampakarambady tao Kanà kosa manambara fa tsy ny divay loatra no tena hafaliana hameno ny fontsika fa i Kristy. Ny fitokisana amin’ny Teniny sy ny Tenany no Harena sy antoka hahafahana mamakivaky ny fiainana, dia moa ve tsy izany ny voadin’ny fahantrana izay fiezahana hampiasa ny haren’ny tany hanitarana ny haren’ny lanitra!
Raha te hihaona amin’i Kristy ianao dia miangavy anao aho : aza adino ny manomana ny fanomezana hatolotrao azy!
[5] Tandremana ho an’izay mpandidy sao manao ohatra an’i Eroda !
Ho an'ny Mpino |
Rohy maharitra |
Verindrohy (trackback) (0)
Arahaba nahatratra ny taona
harilova | 04 Janoary, 2007 00:16
Arahabaina nahatratra ny taona. Ny firarian-tsoa ataoko anao dia ny tso-drano izay nasain’ny Tompo ataon’i Mosé (Nb 6, 23-27) tamin’i Aarona sy ny zanany manao hoe : “Hitahy anao sy hiaro anao anie ny Tompo… Hampamirapiratra ny tavany amino sy hiaro anao anie Izy…. Hanopy ny masony amino anie ny Tompo ka hanome anao ny fiadanana”.
Raha natokana ho andro iraisam-pirenena ho an’ny fiadanana manko ny Taombaovao (1 janoary) dia mahatsiaro ny tenin’i François d’Assise tamin’ny rahalahiny, notantarain’ny pretra iray izay aho hoe : “Andriamanitra dia manome antsika ny fiadanana, fa tsy mamela antsika hiadana”. Toa mifanohitra nefa izany tokoa : amin’ny teny frantsay dia hoe: “Dieu nous donne la Paix nais ne nous lasse jamais en paix”.
Manamafy izany ny Hafatry ny Papa ho an’ny andron’ny Fiadanana : « Fanomezan’Andriamanitra ny Fiadanana no sady ezaky ny mpiara-belona »[1]. izany hoe fanomezana mampiasa... tsy mamela hipetrapetraka...
Dia hoy aho aminao :
Enga anie…
Enga anie mba tsy hisy tanteraka izay irinao mandritra ity taona ity…
…. Afa-tsy izay mahasoa anao.
Ka izay tanteraka dia hahatsapanao ny fitiavan’ny Tompo nitsinjo anao…
Izay tsy tanteraka kosa hahatsapanao ny adidy tsy vita sy ny halemen’ny olombelona miara-monina aminao… izay mila ny fahasoavanana avy amin’ny Tompo…
Raha lazainao ho fahalemen-tsaina[2] ny ahy dia lazaiko anao fa tsy mahery saina noho iza ianao ka hahatanteraka izay irinao… izay mazàna hafa noho izay lazainao amin’ny olona.
Tsy maro manko ny olona tena sahy mamboraka ny faniriany lalina amin’ny hafa, fa aleo ny faniriana mety ho tanteraka na izay faniriana tsy holazaina ho “revin-gadra” no lazaina… ary vitsy no tena mahalala ny faniriany marina tokoa... ary asa firy no tena mahalala ny mahasoa azy... saiky ny mahafinaritra mandrakariva manko no ironan'ny safidy... (soa fa saika...)
Samia hotahian’ny Tompo mandritra ny Taona…
[2] Na fatalisme na finoanoam-poana na zavatra hafa….
Fahaiza-miaina |
Rohy maharitra |
Verindrohy (trackback) (0)
Momba ahy
Harilova! Misy tsiambaratelon'ny fo izay tsy azon'ny saina takarina na oviana na oviana...
Io fo io no tiako hizara aminao ny tsiambaratelony,
aza miezaka ny hanakatra azy araka ny saina araka izany,
fa miezaha mandinika azy araka ny fo...
dia izay no
DINIKY NY FO...
nohezahana naRINDRA
mba ho zHARY LOVA
Fanoroam-pejy
Fitadiavana
Kalandrier
| « | Janoary 2007 | » | ||||
|---|---|---|---|---|---|---|
| Ah | At | Ta | Ar | Ak | Zo | As |
| 1 | 2 | 3 | 4 | 5 | 6 | |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | |||