DINIKY NY FO

Mifalia mandrakariva... ao amin'ny Tompo! (Fil, 4,4).

Dia nandinika aho hoe aiza tokoa moa ny loharanon-kafaliako? Inona no mahafaly ahy? Raha ho avy ny Krismasy, toa ireo fetifety isan-karazany, na ny any am-piangonana aza no tiako kokoa, noho ilay Andriamanitra tonga niara-nonina tamiko...

Raha te hifaly marina isika dia tsy maintsy mitady izany hafaliana izany, ao amin'ny Tompo... Dia hilaza ianao izany hoe ny tsy mpino izany tsy mba ho faly?

Raha ataontsika hoe fahasoavana sy fanomezana avy amin'Andriamanitra ny Finoana, dia miangatra Andriamanitra tsy nanome izany ireo tsy mpino... nefa sao sanatria tsy hoe Andriamanitra no tsy nanome fa izy ireo no tsy nandray!

Ny tena fahaliana manko dia maharitra. Tsy azo afangaro ny hafaliana sy ny fijaliana. Misy aza karazana aretin-tsaina mitady hafaliana amin'ny fampijaliana (masochisme), efa resaka hafa moa izany...

Ny hafaliana ao amin'ny Tompo dia ny fahitana fiadanana amin'ny manodidina, mety ho amin'ny fifampizarana ny manta sy ny masaka izany (jereo Lk 3,10), mety koa ho amin'ny fifandeferana amin'ny fahalemena, izay antsoin'ny Kristianina hoe "Famindram-po"...

Tsy ao amin'ny zava-mahadomelina ny tena hafaliana fa mandalo ihany ny hafinaretana azo avy ao... tsy avy amin'ny  revirevy sy ny hafinaretan'ny nofo ny hafaliana, fa na ny fitiavana aza ataontsika sarim-po maratran-jana-tsipika...

Ny hafaliana maharitra  dia ny fanekena ilay Andriamanitra eo anivontsika... nanaiky hiara-monina amintsika... ary Fitiavana mamindra fo amintsika mandrakariva.

Mba diniho kely moa ny zavatra tena mamppitebiteby anao e, mazàna ny fiezahana hanafina ny marina, ny fiezahana tsy hanaiky ny zava-misy na ny fetran'ny tena...ataoko fa ireo no mampijaly ny olona indrindra eto an-tany... Tsy enjehin'ny eritreritra loatra, toy ny lazain'ny Ntaolo, fa te handidy alohan'ilay mandahatra ny zava-drehetra...

Ny fanekena an'Andriamanitra hiara-monina amintsika dia tsy vaha-olana hitondra fahagagana loatra, fa fanalahidy hanokatra ny masontsika hiaiky ny marina, hanaiky ny fetran'ny tena ka hidodododo hangataka ny fahasoavan'ilay Mahefa ny zavatra rehetra...

Noely : ekenao tokoa ve fa misy izany? Ekenao tokoa ve fa ankatroky ny noely isika? Matahotra aho hoe tsy izany loatra... Ny kintan'ny Majy efa nosoloan'ny sasany Coca Cola... Ilay Andriamanitra eto amintsika (Noely na Emanoela) efa niova anarana ho "vola"...

Dia mifalia fa noely ny andro e, fotoana fandaniana ny vola sy ny kely voahangona, ny sisa tsy lany mbola hiaretan-tory amin'ny taom-baovao... Dia aorian'izay, mino aho fa hitohy ny hafaliana rehefa manembonembona ny noely tsy hiverina raha tsy amin'ny herintaona indray... dia avy eo dia mba enga anie ho latsa-panenenana hanao hoe : "tahaka izay...! nifaly  tao amin'ny Tompo..."