DINIKY NY FO

"Misy tsiambaratelon'ny fo, tsy ho azon'ny saina takarina na oviana na oviana" B. Pascal

fahaiza-miaina (tohiny)

harilova | 31 Mey, 2006 11:21

Dia atao ahoana ary ny hangina rehefa fantatrao izao fa anao ny rariny?

Ny rariny itompoana mody heloka hoy ny Ntaolo, nefa kosa miankina amin'ny toetran'ny tsirairay ny fahaiza-mangina sy ny fahaizana mandefitra.

Tsy misy raiki-pohy azo ampiarina amin'ny fahaiza-miaina satria "mistery" ny olombelona. Ny zavatra niainako tsy afaka hiainan'ny hafa koa, tsy hoe tsy azo ianaran aho na hoe izaho no mahavita azy, fa ianao koa tsy azo ianarana fa azo koa hakana lesona...

Ny traikefam-piainana no hahafahantsika miaina miaraka amin'ny hafa. Ny hany azoko lazaina anao fa hanampy anao amin'ny fifandraisanao amin'ny hafa dia ireto zavatra manaraka ireto :

  • Iombonan'ny mpandinika momba ny toetr'olona rehetra ny atao hoe : "système de transfert". Ny hafa no fitaratra hahitantsika ny tenantsika tsaratsara kokoa. Ny zavatra tsy zakantsika ao amin'ny hafa dia toetra tsy mbola voafehintsika ao amin'ny tenantsika ihany koa....

==> Miainga avy amin'ny fanetren-tena izany no hahafahana mahafantatra ny tena misimisy kokoa ka hahafahana mandray ny hafa amin'ny maha-hafa azy.

  • Ny fenitra hahafahana miara-monina ka sady ampivelatra ny hafa no mamppivelatra ny tena dia ny "fanetren-tena" (humilité)

==> Tandremana koa ny atao hoe "orgueil déguisé", na hoe ny avonavona izay miseho amin'ny fanetren-tena sandoka... lazaintsika hoe "complexe".

Io complexe io no mahatonga antsika handà rehefa angatahana manao zavatra : "Tsy mahay an'izany aho!"... mba hiandrasana ny hafa hilaza hoe "ataovy fa vitanao io", izany hoe fakàna toky ...

Ny Fanetren-tena tena izy dia ny fahalalana fa misy fetra ny tena fa manana ny talenta ihany koa... fa etsy an-kilany dia manaiky koa fa ny hafa dia manana ny maha-izy azy sy ny fetrany...

Amin'izay dia afaka miara-miaina tsara...

Mety hilaza ianao hoe : "tsy nofinofy ve izany?"...

Misy lalana amin'ny ambaratongany hahafahana manatanteraka izany :

Ny Fahanginana (http://harilova.blaogy.com/post/182/906)

Ny Fifanakalozan-kevitra ...

mbola hitohy

Fahaiza-miaina | Rohy maharitra | Verindrohy (trackback) (0)

Fiaraha-miaina

harilova | 27 Mey, 2006 12:36

Ny olona efa nanana traik'efa momba ny fiaraha-miaina dia mahatsapa ny fahasarotan'ny atao hoe fiaraha-miaina... indrindra rehefa miaraka amin'ny olona tsy afaka ny hifankahazo noho ny fomba fiainana samy manana ny azy...

Ilazako traikefa nahazo ahy ianareo...

Niaraka nipetraka tamina zokiolona iray izay aho, nanampy ahy tokoa izy amin'ny fampitaovana sy ny kojakoja isan-karazany fa nianatra moa aho tamin'izany ka nanaiky izy ny hiantoka ahy...tany am-pitan-dranomasina.

Nanana solosaina iray izay izy ka azoko ampiasaina tsara io, fa izy kosa ireo mpiasa ao aminy no ampanaoviny ny asa ao... milina fanoratana no iantsoany ny solosaina...

Indray andro, voatery niasa alina aho fa misy asa nasain'ny mpampianatra enjehina maika... dia voatery mangataka aminy mba hamela ny biraony mivoha hahafahako mianatra ao amin'ny solosaina...

Ianareo Tanora hoy izy tsy mamaky boky intsony fa miaingitraingitra amin'itony milina fanoratana itony...

Dia tsaroanareo angamba ilay blaogy momba ny asan'olona sy asan'ny omby iny...

Tsy afaka namaly intsony aho satria fantatro fa ny famaliako tsy hanova ny heviny raha tsy ampianarina azy angaha ny mahasamihafa ny milina fanoratana sy ny solosaina...

Dia inona ary no nataoko?

(mbola hitohy)

Fahaiza-miaina | Rohy maharitra | Verindrohy (trackback) (0)

Fahaiza-miaina

harilova | 27 Mey, 2006 11:57

Rahefa mifanerasera amin'ny hafa isika dia mahatsapa fa misy fomba amam-panao tsy mitovy... Tsy fahampian'ny fanabeazanana ve izany? Ratsy taiza ve ny hafa tsy maharaka ny fenitry ny atao hoe : "Fahaiza-miaina"?

Raha jerentsika ohatra ny momba ny fisakafoanana, dia misy ireo fomba fipetraka sy zavatra sasantsasany mila tandremana... indrindra amin'ny sakafo iaraha-manao amin'ny hafa, miaraka amin'ny olona manan-kaja ...

ireny zavatra ireny anefa tsy zavatra indray andro no ianarana azy fa fomba amam-panao izarana ao an-tokantrano...

Fa ny hadino indraindray dia ny fombafomba no ianarana fa ny antony nandraiketana ny fombafomba tsy ampitaina akory amin'ny beazina...

Fa maninona ohatra no tsy azo apetraka eo ambony latabatra ny kiho rehefa misakafo? misy antony ve sa kosa karazana filamatra hanavahana ny sarangan'ny "mahalala fomba" fotsiny?

Dia lasa tontolon'ny fombafomba ny tontolo...

Fahaiza-miaina | Rohy maharitra | Verindrohy (trackback) (0)

Vakaka

harilova | 25 Mey, 2006 11:34

Ity vavaka ity dia azo lazaina ho famintinana ny toe-panahin'ny olona iray votom-pinoana ka afaka mivavaka marina tokoa amin'ny Fanahy sy Fahamarinana : Vavaka famaranana ny andro izy ity
(Azo jerena ao amin'ny tohiny ny dikan-teny niaviany; ny sora-mandry dia fanazavana hanampy hampahazo ny hevitry ny antsa):

Ry Tompo o! Akimpio ny masoko
Mba hahita indray ireo zava-mahagaga vitanao
Ka amin'izao andro efa mandrorona izao,
Meteza ianao hampiposaka hazavana vao indray
Hamirapiratra ao anatin'ny alina.

Tsy mety hahita ny fahasoavana azontsika avy amin'Andriamanitra isika raha toa ka mbola variana amin'ny zavatra ivelany ny masontsika. Mila mikimpy ny maso mba hahatsapa fa tsy ny hitany na izay ezaka nataontsika no nampamokatra ny zavatra nisasarana fa ny fahasoavany irery ihany.
Izay no mahatonga ny mpino hahatoky mandrakariva na dia tonga haizina sy tsy misy fanantenana aza ny fiainana : Izy ilay mampitsimoka ny voa rehefa matory ny mpamafy...

Enga anie ny fahanginana manodidina ahy
Hankahery ahy amin'ny halemen'ny finoako
Reko manakoako ao anatiko ao manko
Ireo Teny izay naloaky ny vavanao.

Raha mbola maheno ny tabataban'ny tontolo manodidina isika tsy afaka ny haheno ny tenin'Andriamanitra izay mibitsika ao anatin'ny mangina. Ny fahanginana no manampy antsika haheno sy hampiditra ao anaty ny tenin'Andriamanitra.

Ry Tompo o! Raha mbola miposaka ny andro
Dia hatolotro anao ny fanahiko
Ampy ho ahy ny fahasoavanao
Ka izy ihany no italahoako aminao.

Ny fanantenana ny ampitso vaovao dia apetraka mandrakariva eo ampelatanan'Andriamanitra. manampy antsika be dia be kosa tsy hioha-pefy ny hafatr'i Ignace tany Loyola hoe : "rehefa miasa ianao dia hevero ho miankina aminao ny zava-drehetra... rehefa mivavaka hevero ho miankina main'Andriamanitra avokoa..."

 (tohiny)

Ho an'ny Mpino | Rohy maharitra | Verindrohy (trackback) (0)

Méthodologie

harilova | 16 Mey, 2006 12:28

Tsy haiko loatra ny handikana amin'ny teny malagasy ity "méthodologie" ity, misy anefa mangataka azy io matetika, indrindra rehefa akaiky ny fanadinana...

Tantaraiko anareo ny zava-nitranga indray mandeha tany Antanàna tany :

Nisy mpampianatra iray izay nilaza fa tsy maintsy afaka fanadinana izay manaraka ny "methodologie" omeny, fomba fianatra angaha no hilazantsika azy!

Dia notangosany enina arivo isan'olona izahay mba hahazo izany methodologie izany, te ho afaka fanadianna moa ny tena...

Inona hoy ianareo no nampianariny tao? zavatra vaovao hono hoy izy...

Dia nasainy namaky indray mandeha ny lesona izahay... nasainy namerina namaky... dia naverina hatramin'ny in-dimy ny famakiana...

Tsy fanaovana tsianjery anefa izany fa fidirana amin'ny antsipirihan-javatra kosa... asa lahy.

Dia lany ny enina arivo fa izahay kosa nahazo méthodologie : ny adalanareo no handoavanareo vola mba haneren'ny olona anareo hianatra...

Sahalahala amin'izany ihany no nadoavanay dimy alina mba haneren'ny mpampianatra anay hianatra hitendry masinina tsy an-kijery...

Raha tsy ao ny sitra-po hianatra dia hararaotin'ny hafa fotsiny isika...

Ny sitrapo hianatra anefa tsy ho azontsika rsha tsy mazava ao an-tsaina ny zavatra atao, ny tiana atao sy ny mety ho vita...

io no ilana olona hitantana mba tsy ho voafitaky ny nofinofy fotsiny ihany...

Ny sain'ny olombelona | Rohy maharitra | Verindrohy (trackback) (0)

Ahoana ny mivavaka?

harilova | 13 Mey, 2006 07:19

Lazain'ny Kristianina matetika ny hoe : andeha hivavaka aho, ny sasany mampiasa ny  hoe : andeha hiangona ny alahady...

Fa inona no atao hoe : mivavaka?

Raha ny teny hoe vavaka, raha vao lazaina dia adika avy hatrany hoe hataka atao amin'andriamanitra. dia hoy isika matetika hoe : mba mangata-bavaka aminareo aho fa ...

Fa tsy voafetr'izay fangatahana izay ihany ny vavaka ...

Ny vavaka dia ny traikefam-piainana miaraka amin'Andriamanitra, ny fahaizantsika miresaka amin'Andriamanitra. Tsy hoe teny atao amin'Andriamanitra araka izany fa teny hifanaovana amin'Andriamanitra.

Tokony hatao an-tsaina fa izay mino an'Andriamanitra dia tsy izay mahay miteny momba an'Andriamanitra fa izay mahay miteny (miresaka) amin'Andriamanitra.

Ny resaka, araka ny fantatsika dia hifamaliana, ka raha tsy mahafeno izay fepetran'ny fifamaliana izay izany ny vavaka ataontsika dia tsy mbola resaka...

Fifamaliana (tsy amin'ny hevitra hoe fifandirana tsy akory): izany hoe tsy teny (fangatahana) ataontsika amin'Andriamanitra fotsiny, fa koa fahaiza-mihaino koa izay lazain'Andriamanitra amintsika koa.

Izay no hahafahantsika manatanteraka ny didy hoe : mivavaha mandrakariva...

Afaka miresaka amin'Andriamanitra mandrakariva isika,  amin'ny fanolorana aminy ny fiainantsika fa koa amin'ny fitadiavantsika mandrakariva ny sitra-pony manoloana ny zava-mitranga.

Misy fepetra sy toe-po tsy maintsy kolokolointsika anefa mba hahafahantsika miaina izany fivavahana izany...

Iray amin'izany ohatra ny Fahanginana...

http://harilova.blaogy.com/post/182/906

Ho an'ny Mpino | Rohy maharitra | Verindrohy (trackback) (0)

Ny fahanginana

harilova | 12 Mey, 2006 04:44

Ilain'ny sain'ny olombelona ny mahay mangina, ary mety fanafody hahasitrana ny aretina sasany mihitsy aza...

Mba hahafahana milaza ny soa azo avy amin'ny fahanginana dia tsara ny mamariparitra mialoha ny tiana holazaina amin'ny teny hoe Fahanginana. Mety sty hitovy manko ny fomba filazana na fahazoana azy ka hiteraka adihevitra tsy hamokatra afa-tsy tabataba ihany.

Ny fahanginana dia tsy hoe tsy fitenenana, fa raha izany dia ho mahay mangina ny moana, nefa izy ireny no tena manao tabataba indraindray...

Tsy tahaka ny fahanginan'ny latabatra na ny vato ny fahanginan'ny olona : izany hoe : tsy hoe fandeferana tsy hanelingelina ny hafa, heno matetika manko ny hoe : "aleoko mangina" rehefa misy ady hevitra ka misy anankiray tsy azo toherin-kevitra (nefa mazàna tsy anankiray fa ny andaniny sy ny an-kilany samy miziriziry amin'ny heviny, tsy mahay manazava izay tiana ho lazaina).

Ny fahanginana dia fahaizana mihaino :

  • Fanaiza-mihaino ny hafa manodidina...
  • Fahaiza-mihaino ny feon'ny fieritreretana sy ny tena fanirian'ny tena ; tsy azontsika lavina fa matetika (na ataoko hoe : indraindray hahay) ny zavatra lazaintsika dia lazaina mba hifanaraka amin'ny modely sosialy fa ny ao am-pontsika dia tsy dia mirona amin'izay loatra...Ny fahanginana dia fahaizana mihaino ny fo, tsy hamitaka ny tena ho amin'ny hevi-dravina mety hitarika amin'ny aretin'andoha fotsiny, na mety hitarika aretim-bavony, noho ny tsy fifanarahan'ny atao sy ny tiana atao ary ny tsy maintsy atao.
  • Ny fahanginana izany dia lalana iray hahafahana mandrindra ireo lafin-javatra telo ireo : ny tokony hatao, ny tsy maintsy atao ary ny tiana atao. Ny fifanarahan'ireo telo ireo no hitarafana ny fahamatoran'ny olona iray...
  • Fa koa...

Ny fahanginana no hahafahantsika mihaino ireo zavatra na hevitra na mety ho fisainana mihoatra ny herintsika, ny fahanginana no hahafahantsika mihaino ilay "Teny" izay tonga nofo, araka ny lazain'ny Filazan-tsara...

Ny fahanginana, izay fahaiza-mihaino no hahafahantsika mihaona amin'ilay "Andriamanitra" izay tsy azontsika fehezina araka ny fahalalantsika...

Io no atao hoe : vavaka

http://harilova.blaogy.com/post/182/913

Ny sain'ny olombelona | Rohy maharitra | Verindrohy (trackback) (0)

Ampianaro mivavaka izahay

harilova | 09 Mey, 2006 04:46

Mba mametraka fanontaniana amin'ny tenako aho hoe : mbamihaino vavaka va re izao Andriamanitra izao? Dia ahoana no fomba fivavahana aminy araka ny sitrapony?

Dia nanaitra ahy fatratra ilay vakiteny indray alahady izay milazalaza ny hafatr'i Jeso ho an'izay mino azy manao hoe : "Tsy maintsy toriana eran-tany ny Fibebahana sy ny famelan-keloka, manomboka eto Jerosalema..." (Lk 24, 34-48)

Dia nandinika aho ... manomboka eto Jerosalema... izany hoe : manomboka eo amin'ny toerana nisy ny Mpianatr'i Jeso, ho ahy izany dia manomboka ao amin'ny fianakaviako sy izay mifanolo-bodirindrina amiko no hitoriako ny Fibebahana sy ny famelan-keloka... fa indrindra indrindra, manomboka ao am-poko...

Dia nahatsiaro ny tantaran'ity Manamboninahitry ny tafika iray ity aho. Mpivavaka be izy io ka mandany ora maro isan'andro hivavahana.

Vao tanora izy dia efa manam-boninahitra ka nivavaka mafy mba hanana ny hery haharetany, hampiasany ny fahefana nomen'Andriamanitra azy mba hitondrany fiovana ho an'izao tontolo izao...

Dia nandeha ny andro, nandeha ny volana, ka nony efa nahazohazo taona izy dia nahatsapa fa toa tsy nisy zava-bita akory amin'izay fanovana tiana hatao...

Dia nahatsapa izy fa ao an-tokantranony aloha no tokony hovana mialoha, ka nivavaka mafy izy mba hiova ho soa ny tokatranony ho tonga tokantrano sambatra sy matahotra an'Andriamanitra...

Fa efa nanomboka nandindona ny fahafatesana noho ny fahanterana, nandinika ny zava-bitany tao an-tokantrano izy  ka nahita fa toa tsy misy fiovana akory...

ka nahatsapa fa tsy izay no tokony ho laharam-pahamehana nimasohany fa ny hanova ny ao am-pony aloha. Dia vaky vava izy nivavaka tamin'Andriamanitra hoe : Hay aho lany andro niezaka hanova ny tontolo, nefa ny foko no tokony ho novàko mialoha.

Dia nivavaka izy mba homen'Andriamanitra azy ny fahasoavana hanova ny fony ho tonga mahalefitra sy matahotra azy...

Soa fa tsy tara loatra izy nahita fa hay afaka manova ny fahitana izao tontolo izao ny famindrampon'Andriamanitra.

Dia hoy aho hoe : tsy mbola tara aho fa ndeha hivavaka mba hiovan'ny foko...

Dia nanjary misy heviny ho ahy ny hafatr'i Jeso hoe : manomboka ao Jerosalema no hitoriako ny famindram-pony... Hainy ny manitsy ny diako raha sanatria mitady hanao dingan-davitra any ivelany...

Mazàna manko isika mivavaka ho an'ny hafa fa tsy mahatsiaro fa isika no tokony ho vonton'ny fivavahana voalohany...

Ho an'ny Mpino | Rohy maharitra | Verindrohy (trackback) (0)

Ho an'ny ondry

harilova | 07 Mey, 2006 06:53

Tohin'ny ho an'ny mpiandry ondry

Ny ondry kosa hoe tokony hahafantatra ka hihaino ny feon'ny Mpiandry... Hihaino ny feon'i Kristy.

Dia mandinika aho hoe iza no tena henoin'ny olona kokoa : ny dokam-barotry ny fahitalavitra sa ny fampianaran'i Kristy?

Dia tsy afaka manao safidy matotra indraindray ka ny lamaody natao hahatarika ny maso sy tsy maotina hita amin'ny dokam-barotra dia tonga hatrany am-piangonana...

Mila mandalina ny finoana isika satria indraindray ny fihetsika tsy voatandrina ataon'ny ondry kely iray no hamongoran'ny sasany ny ondry iray vala...

 

Ho an'ny Mpino | Rohy maharitra | Verindrohy (trackback) (0)

Mpiandry ondry tsara! ho an'ny Mpiandry ondry

harilova | 07 Mey, 2006 06:26

Hafatra ho an'ny mpiandry ondry  ity e

Ankalazain'ny Katolika androany ny fetin'ny Mpiandry ondry tsara, alahady fahaefatra aorian'ny Paska io. Dia nalahatra hovakiana amin'ny fanompoam-pivavahana androany ny Vaovao mahafaly, na Filazan-tsara nosoratan'i Jaona (10, 11-18) mitantara an'i Jeso mpiandry ondry tsara...

Dia lasa ny eritreritro...

Voalaza ao ireto toetran'ny Mpiandry ondry tsara ireto :

  • Mahafoy ny ainy ho an'ny ondriny,
  • Mialoha ny ondriny ho any amin'ny tanimbilona ny mpiandry ondry, izany hoe mijery mialoha ny toerana misy vilona hitondrana ny ondry...
  • Dia mpiandry ondry mamela ny 99 ao am-bala mba handeha hitady ilay tokana nania io...
  • ...

Ireo ihany aloha no entiko mijery ny zava-misy ka lazaiko amin'ny fo tsy miangatra ...

  • misy ireo "mikarama" mba hiandry ny ondrin'ny Tompo, manao ny asa fitoriana ho asa fivelomana ambonin'ny zavatra rehetra ...
  • mazàna ny Mpandry mandroaka ny ondry avy aty aoriana, ka manery azy indraindray any amin'ny tany tsy misy vilona akory... Dia ho sanatria ho toy ireo fariseo lazain'i Jeso hoe mametraka ny lalàna eo an-tsoroky ny olona nefa ny ratsan-tanany aza tsy atehiny eo akory...

Fa ity no tena manaitra ahy :

  • Ny Mpiandry ondry tia bebe kokoa ny ondry tsy mila ambenana loatra.

Ny lazaiko amin'izany dia ireo mpiandry ondry (ray aman-deny, Mpampianatra, mpitondra fiangonana...) izay milaza fa kristianina, izany hoe mpianatra izay ataon'i Kristy, nefa tsy mahafoy ny 99 ao am-bala ka ny ataony aza dia ny mamela ho very any an-tendrombohitra ny tokana nania...

Ampitapitao amin'ireo Mpitantana sekoly kristianina mandroaka mpianatra maditra ny hafatra, satria raha roahany izy ireny mba hiadanan'ny 99 "hendry" (toa tsy mila fanabeazana akory) dia aiza sy aiza no toerana ametrahana ny hafatr'ilay Mpiandry ondry tsara lazaina fa harahina?

Tsy misy vahaolana mora raisina ny amin'izany anefa satria sarotra izany, nefa mampandinika ihany...

 ... mahatsapa ny habibiana mitranga etsy sy eroa isika, mety mba efa nandalo teny amintsika teny ny sasany tamin'ireny olona ireny fa nahilika satria "ratsy" ka tsy nahazo ny fanabeazana tokony ho azony...

Soa fa mahefa ny zavatra rehetra Andriamanitra ka mihaino ny vavaka ataon'ny Talen-tsekoly Kristianina ho an'ny Mpianatra maditra noroahiny... Enga anie 

hitohy http://harilova.blaogy.com/post/182/868

Ho an'ny Mpino | Rohy maharitra | Hevitra (2) | Verindrohy (trackback) (0)

Hevitro... Hevitr'i surdoué

harilova | 06 Mey, 2006 00:27

 "Tena siora ve i harilova fa tsy namaky boky hafa mihitsy raha nanoratra ireo hevitra be dia be ireo ? Raha eny dia miarahaba anao fa tena "surdoué" izany ianao.[Fiffi] "

Io Fanontaniana napetraka tamiko any amin'ny Forum momba ny sarivongana dia niainga ihany amin'ny lazain'ingahy Marozevo hoe: tena hevitrao irery ve ireny?

Tena namaky boky be dia be tokoa aho, ary azoko lazaina fa anisan'ireo "voalavon'ny tranom-boky", kanefa ny mahagaga ahy dia tsy mba hitan'i Marozevo sy Fiffi ny filazako ny hevitr'ireo olona nanaitra ahy ka namolavola ahy hanana ny hevitro.

Hevitro hoy aho satria manko "tsy noho ny filazan'izy ireo intsony no mahatonga ahy hahita ny fahamarinany  fa izaho mihitsy no mahatsapa izany".

mampahatsiaro ahy andalan-tSoratra Masina iray izay io, momba ilay vehivavy tao Samaria nahita fa mpaminany Jeso... dia nitantara tamin'ny iray tanàna...

Rehefa nitoetra telo andro tao i Jeso dia hoy ny olona hoe: "Mino izahay, tsy noho ny filazan-dRavehivavy fa ny Masonay no nahita, ny sofinay no nandre..."

Ivereno vakiana ny sasantsasany amin'ireo site ireo dia hahita ianareo fa misy hevitra mety efa hitanareo tanya n-toeran-kafa ao, saingy kosa tsy lazaiko tsy hoe mangalatra hevitra aho, fa kosa tsy fantatro intsony hoe iza no nahita azy voalohany, satria ny fomba filaza hevitra dia mivoatra araka ny zava-misy, ary ny hevitry tsirairay kosa, mihamatotra amin'ny fifampikasohany amin'ny an'ny hafa...

Raha zavatra siantifika no lazaina fa zavatra misy azo raisina, toy ny nolazain'i marozevo amiko hoe : " > Novakiako ilay site, manaitra fa tsy misy ho raisina satria tsy scientifique fa vetsovetso sy sentiment no betsaka ao.farafaharatsiny mba asiana bibliographie na boky iray ihany aza"

dia diniho ihany satria aoriana kely izy milaza hoe : Zao koa ary fanontaniako : "Tena siora ve i harilova fa tsy namaky boky hafa mihitsy raha nanoratra ireo hevitra be dia be ireo ? Raha eny dia miarahaba anao fa tena "surdoué" izany ianao" , izany hoe: tena misy ho raisina tsara mihitsy ny zavatra nosoratako, fa tsy fantatra hoe aiza no hanovozako hevitra... dia mahavaka ny hevitro hoe : inona no tena hevitr'i marozevo!!!

Ny hevitrao no hanovozako hevitra, ianao dia tsy iza fa ilay hafa fijery noho izaho fa mahita ny lafin-javatra mety tsy hitako, na nahita azy tamin'ny fooana mialoha ny nisiako... tsy ho hary ho voatanisako "ianao" ka aleoko tsy tanisaina ara-tsiantifika...

NB. Miala tsiny fa notanisaiko ao ny nilaza ireo hevitra ireo dia i Fiffi sy marozevo satria matahotra aho sao toriany any amin'ny Omda...nefa ny ara-baiboly aza mazana tsy apetrako ao ny toko sy andininy satria fantatro fa tsy hitory ahy amin'ny OMDA ra-Jeso

 

Ny sain'ny olombelona | Rohy maharitra | Verindrohy (trackback) (0)

Inona ny hevitrao?

harilova | 05 Mey, 2006 11:25

Mazàna rehefa anontaniana ny heviny ny olona iray dia milaza ny hevitry ny olona malaza iray hanohanana ny azy...

Fomba ampianarina any ampianarana, indrindra amin'ny sekoly ambony ny manao "référence" amin'ny fanohanan-kevitra. Tsara tokoa ny milaza fa tsy izaho irery no adala manohana ity hevitra ity fa ireto koa efa nilaza izany...

Dia mahatsara ny naoty omen'ny mpampianatra, mahafaly nysofin'ny mpiaino, mambabo ny fon'ny mpamaky raha asiana fehin-kevitr'olo-malaza iray ao anaty lahatsoratra...

Fa fahendrena ampianarina koa ny milaza ny hevitr'olon-kendry mifanohitra amin'ny lazain'ny tena... dia avy eo ra- Mpianatra mazoto manao fehin-kevitra handravonana ny asasoratra ka ny farany, na izy aza tsy mahalala ny tena heviny fa nanao marimaritra iraisana fotsiny...

Raha ny Papa no milaza dia manaiky avy hatrany ny katolika... dia izany no nampamonoana an'i Galilea rehefa nilaza fa tsy anjaran'ny Papa ny mandinika ny momba ny lanitra (habakabaka) fa ny hahatongavana any an-danitra (paradisa) no anjarany, satria nahita i galilea fa ny tany no mihodina fa tsy ny masoandro...

Efajato taona aty aoriana vao mifona ny amin'izany i Joany Paoly II...

Nahalasa saina ahy manko ny nolazain'i Marozevo ao amin'ny [http://serasera.org/forum/?rub=dinika/message&msgid=m444e6e864eac3] momba ny sarivongana hoe : "Novakiako ny hevitrao... fa tsy misy raisina satria tsy misy sitation na référence..."

Maheno olona miresaka aho matetika dia milaza hoe :"Tena marina izany... satria efa hitako tao anaty boky..."

Fa angaha ny ao anaty boky no marina? tsy izay lazaiko koa anefa ho hiambohoko ho marina, tsy hevitra nipoitra avy amiko manko ny ankamaroan'ny hevitro, fa hevitry ny hafa nampindraminy ahy tamin'ny fampianarana nataony sy ny fianarana nataoko fa narindran'ny fisainako ho tonga "hevitro".

tsy afaka mihambo ho mpamoron-kevitra isika kanefa kosa mila manefy ny hevitra antsika ireny...

Mila tsikeraina mandrakariva anefa ireny hevitra ireny, fa hoy ny ohabolana frantsay hoe "ny adala irery no tsy mety mihova hevitra..." lazain'ny razantsika amin'ny fahendreny hoe "adala nomen-tanan'ondry, na hosoloina hofany aza tsy tia"...

Anjaranao ny mandinika ny antony hanohananao ny hevitrao, sy nya ntony tsy ankasitrahanao ny hevitry ny hafa... tsy noho izy be mpanaraka na noho izy nolazain'ny olomalaza, fa noho izy mifanaraka amin'ny marina sy ny tokony ho izy...

Mbola hitohy

Ny sain'ny olombelona | Rohy maharitra | Hevitra (2) | Verindrohy (trackback) (0)

1 2 3  Manaraka»
 
Powered by LifeType - Design by BalearWeb