DINIKY NY FO

"Misy tsiambaratelon'ny fo, tsy ho azon'ny saina takarina na oviana na oviana" B. Pascal

Fahaiza-miaina (tohiny)

harilova | 28 Jiona, 2006 01:05

Resaka baolina no tantaraiko aminao eto kanefa mampandinika ihany  ka mety hanampy antsika amin'ny fanatsarana ny fahaizana miara-miaina.

Tamin'ny match Italia vs Australie no nahitako ity : rahefa avy nanome karatra mena an'i Materassi ilay mpitsara dia nimenomenona ny italiana hoe : miangatra ny mpitsara ary tena tsy mahay n'inon'inona.

Fa rehefa ho tapitra ny lalao ka nanome ilay penalty ho an'ny italiana ilay mpitsara na dia tsy ho tokony ho mbola ho penalty aza izany raha oharina amin'ireo hadisoana nataon'ny italiana koa, dia niova indray ny endrik'ilay mpitsara : "tena mahay io, tena tsara ilay mpitsara".

Dia izany no fiainantsika matetika : tsy mitsara araka ny zava-misy fa araka ny tombontsoan'ny tena sy ny mahafalifaly ny fo ihany koa.

asa lahy, mety ho manonofinofy ve i Harilova raha toa ka milaza aminao hoe tsy tokony ho izany no izy.

Mba diniho ihany....

Fahaiza-miaina | Rohy maharitra | Verindrohy (trackback) (0)

Natory tao an-tsambokely ny Tompo

harilova | 24 Jiona, 2006 23:12

Ny Fanontaniana napetraky ny Tompo manoloana ny fisalasalan'ny Mpianatra no  zaraiko aminao : "tsy manam-pinoana ihany ve ianareo?" (Mk) na ny hoe "Ry kely finoana" (Mt) na ny an'i Lioka hoe "aiza ny finoanareo?"

Fa inona ny finoana, ary raha amiko no apetraka ireo fanontaniana ireo dia inona no avaliko Azy?

Ny Evanjely araka an'i Marka (Mc 4,35-41) no niaingako hanaovana ity fifampizarana ity aminao. Tsy nolazain'i Marka ao ny famaritan'i Jesoa ny Finoana, izay "hery" ahafahana manao zava-mahagaga hatramin'ny mahafindra tendrombohitra (Mt 17,20 na Lk 17,6).

Raha lazaina ambangovangony dia toa zavatra mandeha fatrany ny finoana ao amin'i Matio (kely na lehibe) ary misy na tsy misy ao amin'i Lioka. Tsy ny habehany anefa no inona fa ny fananana azy.

Ao amin'ny laharana faha-37-39 amin'ny taratasy ansiklika nosoratany dia manazava ny toe-po tokony hananantsika ao anatin'ny adim-piainana ny Papa. Ny taraina mety hataontsika toy ny nataon'i Kristy teo amin'ny hazofijaliana hoy izy dia tsy hoe sanatria fanomezantsiny an'Andriamanitra hamela antsika ho irery fa kosa fanamafisana ny finoantsika ny Fitiavany izay tsy handao antsika na oviana na oviana.

Araka izany ary, ny Finoana dia ny fitokisana io Fitiavana izay Mahefa ny zavatra rehetra io.

Manana izany ve aho?

Ny azoko zaraina aminao dia hoe : Tsy indray andro no handalinana ny finoana, fa amin'ny fizotran'ny fiainana isan'andro vaky, ka hijerena mandrakariva hoe : "Inona no anjara toerana mba omeko an'Andriamanitra eo amin'ny Fiainako?"

Indraindray manko, efa tsy afaka manohitra ny tafiotra isika, efa nanao izay tratry ny hery, dia izay vao mahatsiaro fa "toa matory izany Tompo ka mamela antsika ho irery".

Tsy aleo ve manontany azy, mamoha azy aloha nanontany hoe : inona no tokony hataoko? izany hoe : manome Azy ny toerana... voalohany!!!


 

Ho an'ny Mpino | Rohy maharitra | Verindrohy (trackback) (0)

Ny Fitiavana

harilova | 21 Jiona, 2006 06:57

Eo am-pamakiana ny Evanjely mitantara an'i Jesoa natory teny anaty sambokely  niaraka tamin'ny mpianatra aho dia lasa ny saiko hoe : inona tokoa moa no atao hoe : Fitiavana?

Rehefa manonja ny rivotry ny fiainana dia tsaroana fa toa matory ny tompo ka mamela antsika ho irery...

Asa raha efa mba henonao fa tantaraiko ihany ilay antsa mahafinaritra nataon'ny pretra breziliana iray (azo jerena ao amin'ny Ankalazao ny Tompo Sabotsy faha-4 io), mitantara ireo mpifankatia roa (izaho sy ny Tompo Andriamanitro) niara-dia teny amorontsiraka, nifampitantana... ka indro ny dian-tongotra maneho ny fiarahana... manga ny lanitra ... hasambarana re izany... manga ny lanitra...

Fa nanomboka nitsoka mafy ny rivotra, tonga ny tafiotra... ary indro fa tsy nahatazana afa-tsy dian-tongotra roa... tsy hita ny malalako...

Dia nanomboka nimonomonina aho... niantso mafy hoe : aiza ilay sakaiza manody izay nandao ahy tamin'ny andro sarotra?...

Fa namaly ahy ny malalako sy nilaza tamiko hoe : nahoana ianao no dia tezitra toy izao, nefa ireo dian-tongotra ireo milaza mazava fa tao anatin'ny tafiotra dia nataoko an-tsangory ianao, ka ny dian-tongotro no hany sisa tazana, ianao eo an-tsoroko...

Ny Papa ao amin'ny taratasy ansikilika nosoratany dia milaza fa afaka mitaraina toa an'i Kristy teo ambony hazofijaliana isika, ao anaty fijaliana, tsy sanatria tsy akory hanome tsiny azy fa kosa hanamafy ny fitokisana fa tsy mandaoa ntsika na oviana na oviana Andriamanitra...

Dia izany ny Fitiavana... efa maty vao ra-malala... efa tsy eo anatrehana, na toa mandao vao tsapa ny hasarobidin'ny fisiany...

Vokatry ny fitiavan-tenantsika ve izany? Angamba tsy izany loatra fa samy efa nahatsapa ihany angamba isika fa tsy mahalaza ny Fitiavana ny teny...

Azo adika ho toy izany ny antony nanontanian'i Jesoa an'i Piera in-telo hoe : tia ahy va ianao? Ny niafarany dia niaiky i Piera hoe : "ianao no mahalala ny zavatra rehetra..."

Dia mandinika ny fifandraisako amin'ny Tompo aho, dia mahatsapa ihany koa fa mazàna anatin'ny andro mafy sy ahitako olana no hihaonako bebe kokoa amin'ny Tompo, miohatra noho ireo androm-pahombiazana izay indraindray hanadinoako fa avy aminy no nahazoako ny zavatra rehetra...

  

 

 

Momba ny Fitiavana | Rohy maharitra | Hevitra (2) | Verindrohy (trackback) (0)

Ny Eokaristia Masina

harilova | 18 Jiona, 2006 23:05

Fetin'ny Sakramenta Masina omaly, ankoatra ireo fanajana fanaon'ny Fiangonana toy ny procession sy ny vavaka fitsaohana dia  nampandinika ahy fatratra ny Evanjely nosoratan'i Marka momba ny Eokaristia : Marka 14, 12-31 izay novakiana tamin'ny Sorona Masina omaly. ka zaraiko aminareo :

Misy hevitra telo notsoahiko avy amin'ny votoatin'io andalan-tSoratra Masina io :

  • and. 12-16 : ny fanomanana ny Paka
  • and. 17-21/27-31 : ny famadihan'i Jodasy sy ny fandavan'i Piera
  • ny Fankalazana ny Eokaristia

Avy amin'izay no nisintonako ireto fandinihana ireo izay heveriko mety hahasoa anao:

  1. Mila fanomanana ny fankalazana ny Eokaristia
  2. Didy avy amin'i Jesoa ny fankalazana ny Eokaristia
  3. Miantraika amin'ny fiainana ny fankalazana.
  • Ny Fanomanana ny Eokaristia :

Mila fanomanana ny fankalazana ny Eokaristia. Mba hahafahana milazany fanomanana ilaina amin'izany dia tsara ny mamaritra aloha hoe inona no tiana holazaina amin'izany Eokaristia izany. Tsy mivaona amin'ny hevitra ara-bakiteny isika mamaritra hoe : "ilay fisaorana tsara indrindra", vavaka fisaorana...

Raha vavaka fisaorana ary ny Eokaristia dia ilaina ny manomana ny fo amam-panahy amin'izany fisaorana izany. Ankoatra ny Prefasy, vavaka ataon'ny pretra manokana hisaorana an'Andriamanitra Ray amin'ny Lamesa, dia tokony hanana ny "prefasy" azy tsirairay koa ny mpino, hanana ny antony mahavelom-pisaorana Azy...

Indraindray anefa tsy hita loatra izay endri-pisaorana izay fa saron'ny fangatahana sy ny "ampio (omeo) ihany"...

Ny hasarobidin'izany fanomanana izany dia azontsika fintinina amin'ny lazain'ny evanjely fa efa efitrano voaomana no natolotra ny apostoly kanefa mbola mila fandaminana mba ho mendrika ny fankalazana ny Paka : ho fankalazana ny zava-mahagaga nataon'ny Tompo tamin'ny Razana...

  • Ny fankalazana ny Eokaristia :

Tsy fombafomba vokatry ny fisainana fa didy avy amin'i Kristy ny Fankalazana : tsy tompony isika fa mpamerin-doha...

Ireo lalàna sy fitsipika mifehy ny fankalazana dia tsy mamefy akory fa vao maika aza manampy antsika hifantoka amin'ny didin'i Kristy hoe : "Ataovy izao ho fahatsiarovana ahy".

Tsy didy vao noforonina omaly manko ireny fa vokatry ny Fiainam-panahy nifandovana tao amin'ny Fiangonana ka natao indrindra haneho ny fiombonana sy ny fifankatiavana...

Ny fitandrovana ny rafitra litorjika dia fitandrovana ny maha-tsimialonjafy ny Fiangonana... na aiza na aiza ianao hamonjy lamesa dia tsy hahatsiaro ho vahiny fa zanaka an-trano mandrakariva...

  • Ny Fiainana ny Eokaristia :

Tsy misy heviny ny Eokaristia, raha tsy nahafoy ny rany ho antsika i Kristy... ny fahatsiarovana ny nataony araka izany dia tsy mijanona amin'ny fankalazana fotsiny fa mitohy amin'ny fanekena ho sorona ho an'ny hafa...

Tsy mora anefa izany, rehefa miray aminy amin'ny komonio isika dia miredareda fitiavana ka mirehareha toa an'i Piera hoe tsy handao azy intsony...

Noho ny avonavona dia adino fa "raha tsy Izy, tsy mahefa na inona na inona isika". Ny nataon'i Piera dia manampy antsika tsy hahatoky tena be loatra fa hiantehitra amin'ny fitiavany sy ny famindram-pony, ka na inona na inona fandavana nataontsika azy, taorinan'ny nandraisantsika azy (toa an'i Piera, avy nandray Komonio dia nilaza ho tsy nahalala azy), mbola omeny fahasoavana mandrakariva isika hanavaozantsika ny Fitiavana Azy, ka hahatonga ny famindrampony ho loharanom-pisaorana tsy mety ritra ho antsika... 

Rehefa handeha hamonjy lamesa ary isika dia mba ataovy an-tsaina izay antony hisaorantsika an'Andriamanitra ary rahefa avy namonjy lamesa isika dia italahoy ny famindram-pony mba hahitantsika ny tavany, toy ny nitodihany tamin'i Piera taorian'ny maneno akoho fahatelo, ka hahafahantsika manavao mandrakariva ny fitiavantsika Azy.

Ho an'ny Mpino | Rohy maharitra | Verindrohy (trackback) (0)

Fahaiza-miaina ( tohiny )

harilova | 13 Jiona, 2006 02:00

Mora ny miteny hoe : "Mandefera" fa sarotra ny miaina ny "Fandeferana".

Valan-dresaka anankiray momba ny maha-tsy azo ravana ny mariazy nataona pretra iray izay no nisintonako ity famakafakana zaraiko aminao ity :

"Mandalo 'crise' ny fiainam-panambadiana ankehitriny" hoy ity pretra iray. Marina izany, ary iarahantsika mahalala fa mihamaro ankehitriny ny faharavan'ny tokantrano, noho ny antony maro samihafa.

Ny filazana amin'ireo iharan'ny fisarahana anefa hoe : mifanaraha, mandefera dia somary sarotsarotra ihany...

"izay natambatr'Andriamanitra, aoka tsy hosarahin'olombelona" hoy  Mompera... fa vitan'izay ve izy ity?

Lasa manko ny resaka hoe : nahona ry Mompera sy masera no miala rehefa tsy zakany ny fiainana, na ny tena mahavaka dia hoe : nahoana no alefa mody ny mpiofana rehefa tsy nahatàna intsony ilay hafanam-po nananany tamin'ny vao nandraisana azy ho mpikambana, kanefa tsy azo alefa mody ny vady rehefa tsy ao intsony ny fitiavana ka ady kitrana no hany sisa tavela?

Tsy manome vahana ny fisarahana aho sanatria satria ankoatra ny tsy fitandremana ny teny nifanomezana hoe "tsy hanary anao aho, na ho boka na ho kilemaina!!!" dia iaraha-malala ny fiantraikan'ny fisarahana eo amin'ny fanabeazana ny taranaka...

Ny tiako hisarihana ny saintsika dia hoe : samia mandinika hoe : ahoana no hiarahana monina amin'ny olona ankahalaina na mankahala ny tena? ahoana no hihainana ny Fahendren-dRazana izay toa adinodino hoe :
"Ny Fihavanana toy ny landy ka raha tapaka, mora atohy!"...

Asa lahy fa raha efa mba efa niaina izany atao hoe : Fandeferana izany ianao, dia mba zarao aminay... Tsy ilay fandeferana mandra-paha... anefa, fa ilay fandeferana "na inon-kidona na inon-kihatra...".

Ny hany azoko lazaina dia ilay fampianarana malaza hoe : rehefa tsy  misy V ny mpivady, rehefa tsy misy Vavaka, tsy misy toerana ho an'Andriamanitra, ilay hany fitiavana, dia mpi.ady no sisa tavela...

Kanefa atao ahoana no hamerina an'Andriamanitra eo anivon'ireo toa nilaozany, na sanatria nandao Azy?

Fahaiza-miaina | Rohy maharitra | Hevitra (1) | Verindrohy (trackback) (0)

Fahaiza-miaina ( tohiny )

harilova | 08 Jiona, 2006 23:25

Inona no fepetra tsy maintsy harahina amin'ny fifanakalozan-kevitra?

(jereo ny http://harilova.blaogy.com/post/182/1067 )

Araka ny traikefam-piainako, fa koa araka ny fandinihan'ireo mpahany momba ny fifandraisan'ny olombelona dia mila fahamatorana ny fahaiza-miady hevitra.

Mandritra ny fitomboan'ny maha-olona (vatana/saina/fanahy) dia misy dingana ataony. Tsy mitovy anefa ny fomba hiatrehana ireo dingana ireo fa arakaraka ny toetra sy ny tontolo iainana misy ny tsirairay. Dia araka izany ihany koa ny faharetany.

Amin'ny resaka ataony ary dia miezaka mitady valiny amin'ny fanontaniana mifaningotra amin'ny fiainany ("ontologique") ny olona iray.

Akaka ny mpandinika (ohatra hoe Erik Erikson ao amin'ny bokiny Childhood and society, NY 1950) dia misy efatra ny fanontaniana miandry valiny mivantana na ankolaka ka mandrafitra ny fifandraisan'ny olona  :

  1. Ny voalohany dia ny fahalalana ny tena : Iza aho? Miezaka hampiseho ny tenany sy ny maha-izy azy ny olona iray. Mifandrindra amin'ny dingan'ny fialana sakana io fanontaniana io. Mazava ho azy araka izany fa ny fanehoana hevitra sy ny fitsarana ny hevitry ny hafa dia miankina amin'izay fiarovana ny hevitry ny tena izay, na dia indrainday aza tsy dia mitombona loatra ka voatery manaiky ny an'ny hafa izay toa tsara fototra sy mitombina kokoa... Io no fotoana hisafidianan'ny olona ny soatoavina, izay nahababo ny maha-izy azy notompoiny hatrizay ka hisokafany amin'ny hafa...sy haniriany izay mety ho fomba hanehoany ny maha-izy azy (safidim-piainana).
  2. Eo ampanatanterahana izay safidim-piainana izay no hifanenany amin'ny hafa izay mbola voafetra ihany aloha dia mipoitra ny fanontaniana hoe : Iza aho miaraka aminao? Voaantso hisokatra amin'ny hafa ny olona rehefa nahatsapa io filàna io. Dia manomboka mikolokolo ny tontolon'olon-droa, hifampijerena ihany anefa fa tsy mbola hiaraha-mijery... dia mifantoka amin'ny fiarovana izay tontolo mbola mikombona izay ny resaka ...
  3. Tsy maharitra ela loatra anefa izay fikombonana izay noho ny fifankatiavana tsy fifampijerena fa fiaraha-mijery hany ka voatery misokatra amin'ny hafa indrindra rehefa teren'ny zava-misy noho ny asa na ny andraikitra sahanina, ka manomboka mametraka ny anontaniana hoe : Iza aho miaraka amin'ny hafa sy araka ny hevitry ny hafa? Dia miompana amin'izay hahombiazan'ny asa sahanina sy izay nimasoana ny resaka sy ny foto-pisainana...
  4. Fa rehefa mandroso ny fiainana  dia mahatsapa fa tsy araka ny vivavina loatra ny zava-mitranga dia mipetraka ny fanontaniana hoe : Iza aho anatrehan'ny lasako sy manoloana ny ho aviko? Dia miezaka maka toky amin'ny fiatrehana ny ady farany dia ny fahafatesana izay tsy azo hodivirana...

Izany dingam-piainana izay no tsy maintsy jerentsika rehefa miresaka amin'ny olona iray ka te hifankahazo resaka aminy...

...ny olana anefa dia na isika na ny hafa mety tsy nahavaly ny iray amin'ireo fanontaniana ireo tamin'ny fotoanany ka mety mampandringa ny fahamatoran'ny maha-olona izay hany hahafahana mifanakalo hevitra tsara...

 

 

 (tohiny)

Fahaiza-miaina | Rohy maharitra | Verindrohy (trackback) (0)

Ny fanapahan-kevitra

harilova | 04 Jiona, 2006 23:04

Anisan'ny mahavaka ny saintsika ny mandinika sy mihevitra hoe inona ny sitrapon'Andriamanitra amiko ! Izany no nahatonga ahy hizara aminao momba ny Soratra Masina nankalazaina tamin'ny fetin'ny Pantekoty izay manampy antsika amin'izany.

Ny Vaovao Mahafaly araka an'i Joany moa no novakiana tao am-piangonana : "ny Fanahy Masina no hanoro anareo nylalana mankamin'ny marina,  dia ny marina ao amin'ny hafenoany"...[Jn 15,26-27;16,12-15], miampy ny Taratasin'i Paoly ho an'ny Galata ( 5, 16-25) izay milaza fa "ny vokatry ny Fanahy dia Fitiavana, hafaliana, fiadanam-po..."

Raha ireo no fakafakaintsika tsara dia azo ambara mazava izany fa tsy vokatry ny fahaizantsika na ny hakingan-tsaintsika no hahalalantsika ny sitrapon'Andriamanitra fa Fanomezana maimaim-poana avy amin'ny Fanahy Masina.

Tsy hilaza aminao aho hoe ahoana ary ho hahalalana fa bitsiky ny fanahy izany... izao no azoko lazaina avy amin'ireo Vakiteny masina ireo :

Tsy afaka manapa-kevitra araka ny Fanahy isika raha ao anatin'ny fifandirana (mifanohitra amin'ny Fitiavana), na ao anatin'ny hatezerana (mifanohitra amin'ny fifaliana) na ao anatin'ny fahasahiranan-tsaina sy ny olana (mifanohitra amin'ny fiadanam-po)...

Ny olana anefa dia saika mazàna ao anatin'ireo no handraisantsika fanapahan-kevitra, na miaraka na samirery...

Aza adino fa indraindray isika manosi-bohontanana ny Fanahy, miantso azy mialoha ny fivoriana nefa ny zavatra holazaina efa voasoratra an-taratasy na efa voavolavola mialoha  ka tsy tiana hovana intsony na ny marimarina kokoa tiana hoeken'ny rehetra...

Anjarantsika ny mampanjaka ny Fanahy ao anatin'ny Fitiavana, ny Hafaliana, ny Fiadanam-po.

Ho an'ny Mpino | Rohy maharitra | Verindrohy (trackback) (0)

1 2  Manaraka»
 
Powered by LifeType - Design by BalearWeb