DINIKY NY FO

Naheno ny fahafatesan'ny rahalahiko any an-tanàna aho, dia nanoratra eto izao. Matin'ny Cancer tamin'ny aty hono : areti-mandoza fa ny aza mba voany. Na natao ny fitiliana sy ny fitsabona dia ny aina no nanaraka, sady fotoana fohy monja dia lasa taolana mifono hoditra...

Tampoka ny fahafatesana na hiomanana mandrakariva aza, na dia efa fantatra izao aza fa tsy maintsy ho faty ny manan'aina rehetra: Lalana hoe ny fahafatesana, fa tsy sanatria fiafarana... Tenim-pinoana anefa izany, ka ataon'ny tsy manam-pinoana ahoana ny hahazo azy?

Dia hoy aho hoe : tampoka ny fahafatesana, tsy mbola manan-kavaly ny sain'ny olombelona eo anatrehan'ny fahafatesana. Soa ihany lahy raha tsy izany ho nanao ny tenany ho andriamanitra ra-fikarohana (science).

Manoloana izany aina indramina izany koa dia nanontany tena aho hoe mba oviana tokoa aho lahy no ho faty? Sao mba fiantsoana ahy hanomana ny fahafatesako ny fahafatesan'ny hafa?

Tsy natao ho an'ny mpino ihany ny fahafatesana. Tsy fampiononan-tsaina akory ny fiheverana azy ho fandalovana. Tsy fandemen-tsaina ny fampianarana momba ny fiainan-ko avy. Ilay Tompon'ny Aina no mandahatra ny zavatra rehetra, hainy ny maka, hainy koa ny mamerina azy ho amin'ny hafenoany.

Sanatria ve dia tsy hisy ny lanitra, ka sady very ny filibàna teto an-tany ireo nikatsaka azy no ho diso fanantenana amin'ny any an-koatra?

Hoy i Pascal namaly azy hoe : "Mino ny lanitra aho, ny fiezahako ho mendrika azy tsy sanatria ezaka very maina fa nanampy ahy hivoatra amin'ny maha-olon ahy... hany ka na sanatria tsy misy aza izany lanitra izany (nefa lazaiko mazava fa misy izy), dia tsy matiantoka aho... ireo tsy nino kosa, tsy nandraharaha ny hampisy vidiny ny fiainana, raha tsy misy ny lanitra, tsy nahazo na inona na inona satria tsy hanaraka any an-koatra ny filibàna, fa raha misy kosa ny lanitra, ho very ny zava-drehetra izy ireo satria tsy misy na inona na inona ho azo atao intsony."

Handry ao amin'ny Fiadanan'ny Tompo anie ny fanahinao, ry rahalahiko léon-Paul Razanaparany.