DINIKY NY FO

"Misy tsiambaratelon'ny fo, tsy ho azon'ny saina takarina na oviana na oviana" B. Pascal

Est-il possible d'aimer?

harilova | 31 Martsa, 2007 21:54

Est-il possible d’aimer?[1] Manoloana ny faharavan’ny fanamadiana, ny olana sy ny fitaka hifanaovan’ny mpifamofo Ny Papa Benoit 16sy ny mpifankatia, ny famaritana ny atao hoe fitiavana… dia mametraka fanontaniana isika hoe : sao mba nofinofy sy fampandriana eritreritra fotsiny izao “fitiavana” izao fa tsy hery fanohitra hoenti-manavao ny fiainana tsy akory.
Tsia hoy ny Papa, ho antsika tanora. Tsia… satria ny tena fitiavana marina dia mahatoky, mafy orina ary loharanon-kafaliana sy fiadanana, mampifamatotra ny mpifankatia an-kahalalahana sy ao anatin’ny fifanajana tanteraka.
Misy dingana telo tsy maintsy harahina anefa, hoy Ilay voatsodrano[2], raha tiantsika ny hihaina izany fitiavana marina izany : ny loharanon’ny fitiavana, ny modelin’ny fitiavana ary ny faniriana te hitia marina.
1.      Ny Loharanon’ny fitiavana dia Andriamanitra irery ihany : Andriamanitra dia Fitiavana (1 Jn 4, 8.16) ny Misterin'ny Trinite Masina dia tara-pahazavana ho antsika mba hahitantsika ny Fanahy izay mampiray ny Ray sy ny Zanaka.
2.      I Kristy kosa, ilay Teny tonga nofo mba hanavotra antsika dia nahafoy ny ainy ho antsika mpanota (Rm 5, 8 ) no nampiseho antsika ny modelim-pitiavana : izay tia mahafoy,  eny fa na dia hatramin’ny aina aza.
3.      Izany no mampandinika antsika ka rehefa voakasiky ny tena fitiavana ny fontsika dia te hitia toy ny nitiavany antsika. Ilay hetahetan’i Jesoa teo ambony Hazofijaliana dia ny faniriany hamongotra ny fahotana sy ny fankahalana manakana ny fontsika tsy hitia. Ny hoe tiavo ny namanao tahaka ny tenanao dia mitaky fahatsapana ny fitiavan’i Kristy izay manosika antsika hitia hatramin’ny fahavalo, hitia hatramin’ny farany.

Raha te ho vavolombelon’ny fitiavan’i Kristy isika hoy ny Papa dia amin’ny lafim-piainana telo no tsy maintsy hanehoantsika izany : ao am-piangonana, amin’ny fanomanana ny ho avy, eo amin’ny seha-piainana andavanandro.
·         Afaka mivelona ny fitiavan’i Kristy isika ao amin’ny fianakaviam-be ara-pinoana. Ny hahalalana fa mpianatr’i Kristy isika dia ny fifankatiavana asehontsika (Jn 13, 35). Tokony ho hita taratra eo anivon’ny Paroasy, ao amin’ny Fikambanana Masina sy amin’ny seha-pikatrohana rehetra izany fifankatiavana izany.
·         Eo am-panomanana ny ho avy dia tokony hesorina ao an-tsaina ny hevi-diso milaza fa manakana ny fivelaran’ny tanora ny fiangonana, tsy mahara-damaody, efa lany andro… tsy mahay afa-tsy ny mandrara homana… Mikatsaka ny soa ho an’ny tanora mandrakariva manko ny Fiangonana ary mikendry mba hahamatotra ny fitiavana fa tsy ho sanatria fitia natao ho filàna fotsiny ka voagejan’ny fitiavan-tena sy ny fahafinaretana izay tsy afaka hivelatra ho an’ny hafa na sanatria hampivelatra ny hafa. Na ho an’ireo efa nifanaraka hanorina tokan-trano (mpifamofo) na ho an’ireo mahatsapa fa voaantso ho amin’ny fiainana voatokana na ho amin’ny filaharana, ny laharam-pahamehana dia ny mikatsaka sy manamafy orina ny seha-piainana sitrak’Andriamanitra hampivelaranareo ny fitiavana.
·         Midika izany fa isan’andro no hiezahana hahamatotra ny fitiavana indrindra amin’ny fijoroana ho vavolombelona amin’ny fitiava-namana. Tsy amin’ny fisehosehoana sy ny fifaninanana na amin’ny fisehoana ho mahomby ihany anefa fa amin’ny fanajana ny fahasamihafana izay harena mandrakariva. Ilaina ary tsy azo atao ambanin-javatra araka izany ny fiofanana sy fandalinana ny fampianaran’ny fiangonana mba hitandrovana mandrakariva ny fitiavana, izay tsy manam-pahataperana.

Ny ohatra navelan’ireo olomasina no porofo azo tsapain-tanana fa tsy rediredy ny fahafahana miaina ny tena fitiavana marina, satria ny herin’ny fitiavana no hany afaka manova tanteraka ny fon’ny olona ary afaka manova izao tontolo izao mihitsy aza. Tsy zoviana amintsika ny oha-pitiavana niainan’i Terezy tany Calcutta (India) izay niezaka hizaha ny endrik’i Kristy ao amin’ny mahantra sy ny fadiranovana.
Ny Tsiambaratelon’ny Fitiavana araka izany dia ao amin’ny fihaonana amin’ny Tompo indrindra ao amin’ny Eokaristia. Izy irery ihany no afaka manampy antsika hitia. Ny fifampizarana ny Mofo sy ny fiombonantsika aminy no hery, fanohitra , vy miaina hanentana antsika hahafoy tena hanompo ho fanasoavana ny hafa.
“Ry Rahalahy, aza mitia amin’ny teny sy am-bava fotsiny fa amin’ny asa sy ny fahamarinana. Izany no hahalalantsika fa tao anatin’ny Marina isika no teraka.” (1Jn 3, 18-19). Efa ampiomanin’ny Papa sahady isika ho amin’ny fihaonana any Sidney 2008, ny tenin’Andriamanitra zary aina ho amin’ny fihaonana any moa dia ny hoe : “Homeko ny herin’ny Fanahy ianareo ka ho vavolombeloko” (Asa 1, 8 ).
Miaraka amin’i Maria, matoky isika miombom-bavaka amin’ny Papa sy homban’ny tsodranony hampanakoako ny hiaka hany afaka mitondra aim.baovao ho an’izao tontolo izao : “Fitiavana Andriamanitra”.
Di ahoy aho hoe : ry tanora, efa mba voakasiky ny TENA FITIAVANA MARINA ve ny fonao?


[1] Dikan-teny malalaka no ataoko ho anao eto. Io Rohy io azonao hijerena ny hafatra amin’ny dikanteny ofisialy frantsay.

[2] Benedetto (Benoît )

Ho an'ny Mpino | Rohy maharitra | Verindrohy (trackback) (0)

 
Accessible and Valid XHTML 1.0 Strict and CSS
Powered by LifeType - Design by BalearWeb