DINIKY NY FO

Raha indray andro ihany no fetin'ny Mpifankatia, hanao akory no iainana ny andro sisa rehetra tsy hankalazana ny fety?

Io no fanontaniana apetrako amin'ity andro anio ity. Toa lasa fety hifaninanan'ny tolotra sy ny tinady ihany manko ny fifankatiavana, toy ny hafa rehetra (krismasy sy paska hidirana indray maka isan-taona am-piangonana)...

Ao amin'ny Blaoginy dia nanoratra i ASNAH hoe : "Ny fitiavana dia tsy ny fijerin'ny andaniny ny ankilany fa ny fitiavana dia ny fiaraha mijery ny ho avy".

Dia nametraka hevitra aho hoe : Mazàna ny fiantombohan'ny fitiavana rehetra dia fifampijerena, tsy hoe lany andro mifampijery fa kosa mahalany andro ifampijerena... mialoha ny tena hiatrehana ny fiainana, araka ny tora-kevitr'i Tokinao sy i Soanja.

Heveriko araka izany, fa andro tsy hifampibanjinana loatra ny andro anio, fa kosa hanamafisana ny fifankatiavana.

Raha mandinika ny fiarahanao amin'ny olon-tianao ianao, aza adino ny hasarobidin'ny fahendrena tatsinanana manao hoe : "izay vadiana no tiavina" miohatra amin'ny tandrefana hoe "izay tiana no vadiana". Ny fitiavana dia mila kolokolo, tsy miankina amin'ny fifankafantarana loatra, satria mistery ny olombelona, fa miankina amin'ny fahafohizan-tena...

Dia saintsaino ny fahendrena kristianina hoe : "Manaova soa an'izay mankahala anao, mivavaha ho an'izay manenjika anao..." (Lk. 6, 27ss). Tsy sanatria hivavaka ho azy mba ho faty haingana sanatria, tsy fivavahana izany, fa kosa ny mivavaka ho azy mba hahafahanao mikatsaka ny soa ho azy...

Tadidio mandrakariva fa ny fitiavana no manova ny fo sy ny fomba fijery ny hafa : "Izay tiana no mitombo tarehy"... fa tsy ny fironan'ny fo no hitiavana sy hankahalana... na dia izay aza no mitranga mandrakariva...

Fa inona ny fitiavana?

Heveriko fa laharam-pahamehana ho an'ny tontolo hiainantsika izao ny fahaizana mifanakalo hevitra. Nefa manahy aho hoe azo antenaina ve ny hahatanterahan'izany?

Taorian'ny herinandro nivavahana ho an'ny Firaisam-pinoana dia nanontany tena aho hoe : mba misy fanantenana ve ny hiraisan'ny Mpino? Asa... Mahefa ny zavatra rehetra Andriamanitra....

Fa ankoatra izany, na dia somary mifanohitra ihany aza ao amin'ny lalam-panorenana malagasy ny finoana an'Andriamanitra sy ny fahalalahana amin'ny sehatry ny finoana, dia tsy ho afaka ny hoterena velively ny finoana...

Mba hahafahana mifanakalo hevitra (dialogue) dia misy zavatra iray tsy maintsy apetraka ho fepetra : ny tsy fitompoana teny fantatra... Raha mihevitra ho manana ny marina ny andaniny dia mety hanana ny marina koa ve ny ankilany?

Rehefa mifanena amin'ny tsy Mpino ny mpino, hanaiky ny tsy finoany ve sa hanivahiva azy satria izay no safidiny, asa noho ny fahitany fa toa tsy manova inona loatra eo amin'ny fiainan'ireo mpino ny finoana narahiny... na vao mainka aza lasa fanafintohinana satria miaina ratsiratsy kokoa noho ny tsy mpino!!!

Zavatra roa no heveriko hiorenan'ny fifanakalozan-kevitra, ary zavatra tsy azo hiadian-kevitra : ny lalam-pitondrantena sy ny foto-pisainana.

1- Ny lalam-pitondran-tena (Morale)

Rehefa manizingizina ny fihambonian'Andriamanitra ny silamo na ny Kristianina dia heverina ho misy fiantraikany eo amin'ny fitondran-tena izany... Afaka manao izay tiany ny olona raha foanana ny finoana ny lanitra sy ny afobe... tsy hisy intsony ny tsara sy ny ratsy fa izay tiako sy ny mahafinaritra ny saiko no ataoko...

Raha mandinika tsara anefa isika, tsy azo adinoina fa ny fitondrantena ratsy ataon'ny hafa dia efa zary afobe sahady ho antsika, efa zary fijaliana, samy mizaka ny vokatr'izany... Araka izany, tsy ny finoana ny lanitra sy ny afobe loatra no iankinan'ny lalam-pitondrantena, fa ny fiaraha-miaina. Ka atao ahoana no hanafoana ny fiaraha-miaina? Araka izany tsy maintsy misy fepetra sy drafitra arahina mba hampirindra fiaraha-monina...

2- Ny Foto-pisainana

Ny tiako holazaina eto ny sain'ny olombelona iavahany amin'ny biby, ahafahany "miahy" sy "manahy". Dia nampiasain'ny olona marina tokoa ny saina ka hitantsika ny vokatry ny fikarohana siantifika izay toa tsy misy fetrany intsony...

Dia  lazaina hoe tsy ilaina intsony Andriamanitra izay nanankinana ny tsy takatry ny saina hatrizay... Dia manjary resa-be ny bioéthique sy ny fikarohana ara-tsiantifika... te hanisy fetra amin'ny lafiny fikarohana ny mpitondra fivavahana satria hono hoe : lasa tsy misy vidiny intsony ny maha-olona fa zary seha-pikarohana sy fanaovana andrana toy ny natao tamin'ny bitrovoalavo fahiny...

Tsy ny fisian'Andriamanitra velively anefa no olana, tsy ny izy velively no hanakana ny olona tsy hisaina... Tsy ho zary takatry ny saintsika na oviana na oviana koa ny tontolo... ampahany ihany ary ampahany amin'ny ampahany nohalalinina manokana... Ny hainao tsy haiko, ny ato antsaiko tsy fantatrao...

Ny foto-pisainana dia ny zavatra manery antsika hanao safidy eo amin'ny fiainana... NAHOANA AHO NO MANAO ITY ZAVATRA ITY?

Rehefa mahita ny valin'io fanontaniana io ianao dia aza adino ny mametraka ny hafa manaraka : FA MANINONA AHO RAHA TSY MANAO ITY?.. Raha toa ka natao tsy am-piheverana, ankoatry ny fijerena sy fizakana ny vokany... dia miforona tsikelikely ny foto-pisainana rehefa tsapanao fa tsy irery ianao fa manana mpiara-monina ka manontany tena hoe : ARY MBA TIAKO VE RAHA (N)(H)(M)ANAO TOY IZANY KOA NY HAFA?

Fehiny dia hoe : hany fepetra hahafahana mifanakalo hevitra ny fifampitsinjovana mba hanao amin'ny hafa izay tianao atao aminao...

Tsy sanatria anefa hanakana anao tsy handrara ny hafa tsy hanao izay tsy mety ataonao izany fa kosa hanome hery anao hamporisika azy hitsinjo mandrakariva ny fiaraha-monina amin'ny fifampizakana ny kilema sy ny fiezahana tsy hanao izay tsy tianao ataon'ny hafa aminao...